ҰЛТТЫҚ ДИКТАНТ – РУХАНИ БІРЛІКТІҢ АЙНАСЫ

Бүгін қазақ тілінің мәртебесін көтеру, оны кеңінен насихаттау мақсатында ұйымдастырылған «Ұлттық диктант» шарасына қатысып, ерекше әсер алдым. Бұл игі бастама – тіл тазалығын сақтауға, сауаттылықты арттыруға және халық арасында мемлекеттік тілге деген құрметті нығайтуға бағытталған.
Диктантқа қатысу арқылы әрбіріміз өзіміздің білім деңгейімізді ғана тексеріп қоймай, қазақ тілінің қоғамдағы орнына тағы да бір ой жүгіртеміз. Бұл шара – ұрпақ санасына ана тілін ардақтау, оны қастерлеу сезімін сіңіретін рухани сабақ.
Ұйымдастырушылар – Халықаралық «Қазақ тілі» қоғамы мен Қазақстан Республикасының Ғылым және жоғары білім министрлігі. Олардың бастамасы аясында ел азаматтары түгелге жуық қатысуға мүмкіндік алып отыр. Бұл – тіл төңірегінде халықты біріктіретін, жүректерді жақындататын игі дәстүрге айналған құбылыс.
Мен де осы диктантқа қатысып, Алғыс хатпен марапатталдым. Бұл – тек қағаз емес, ана тілімізге деген шынайы құрметтің белгісі деп білемін. Қазақ тілінің дамуына кішкене болса да үлес қосқаным үшін қуаныштымын.
Қазақ тілінің болашағы – біздің қолымызда. Ана тілімізді құрметтеп, қолдану аясын кеңейту – әрқайсымыздың азаматтық парызымыз.